Donostiaren berreraikuntzaren 200. urteurrena eta Orfeoi Txikiaren 25. urteurrena ospatzeko, Donostiako abesti herrikoiez osatutako disko bat grabatu dute Donostiako Orfeoiko haurren abesbatzak eta Donostiako Udal Txistulari Bandak, eta datorren hilaren 23an, asteartea, arratsaldeko 19:30etan aurkeztuko da Udaletxeko Batzar Aretoan. José Ignacio Ansorenak, Txistulari Bandako zuzendariak, eta Esteban Urzelaik, Orfeoiko zuzendariordeak, parte hartuko dute aurkezpen-ekitaldian, eta jarraian, bi taldeek diskoko abesti batzuk joko dituzte.
Diskoa martxoan zehar grabatu zen Elkar estudioetan, eta guztira 16 abesti ditu, horien artean, Raimundo Sarriegiren hiru: Festara, Viva la broma eta Petra sardin saltzailea; halaber, Pablo Sorozabalen Gabiltzan kalez kale; Antonio Peña y Goñiren Donostia, Norberto Luzuriagaren Coro de bebés, José Olaizolaren Gure Donostia eta José Juan Santestebanen Himno al derribo de las murallas abestiak ere ageri dira diskoan.
Sarrera librea izango da.
