Datorren astelehenean, urriaren 26an, 12:00etan, UPV/EHUko Carlos Santamaría Zentroaren areto nagusian, Donostian, Donostiako Orfeoia-UPV/EHU XIX. sariaren banaketa ekitaldia egingo da.
Iñigo de Peque Leozek eta Jon Bagues Erriondok jasoko dute aipatutako saria. Honek bi helbururekin sortutako saria da: musika munduko ibilbidea aitortzea eta musika ikerketa bultzatzea. Jon Baguesek saria jasoko du bere ibilbide profesional luzeagatik, eta musika ikerketaren saria, berriz, Iñigo de Peque Leozek jasoko du, ‘Nicolás Ledesma (1791-1883), maestro de capilla y organista en el S.XIX español’ lanagatik.
Ekitaldi akademikoan parte hartuko dute: Donostiako Orfeoiko presidente José María Echarri eta UPV/EHUko Gipuzkoako Campuseko errektoreorde Agustín Erkizia.
Ekitaldia bukatzean, Donostiako Orfeoiak bere errepertorio tradizionaleko lanak joko ditu emanaldi labur batean. Gaur egungo osasun egoera dela eta, ekitaldia ez da irekia izango.
