Irailaren 5ean 70. Musika Hamabostaldiari itxiera emango zaio Donostiako Orfeoiak eta Lyon-eko Orkestra Nazionalak eskainiko duten kontzertuarekin. Michel Plasson-ek zuzenduko duen kontzertuan Fauré-ren Requiem-a interpretatuko dute aipatutako taldeek. Ana Salaberria sopranoak eta Paul Armin Edelmann baritonoak bakarlari lanak egingo dituzte. Kontzertuaren lehen zatian orkestra bakarrik arituko da Debussy-ren Preludio a la siesta de un fauno eta Bizet-en 1.go Sinfonia interpretatuz.
Requiem-a 1925etik dago Orfeoiaren errepertorioan eta orduz geroztik taldeak zuzendari ezberdinen zuzendaritzapean interpretatu du. Orfeoiak hainbat aldiz abestu du Requiem-a Plasson-en zuzendaritzapean, izan ere, zuzendari horrekin obraren bertsio bat grabatu zuen Toulouseko Kapitolioko Orkestra Nazionalarekin 1985ean. Fauré-k berak esan bezala, bere Requiem-ak ez du heriotzari beldurra islatzen; obra “zorioneko askapena, goragoko zoriontasuna lortzeko nahia da, esperientzia penagarria izan beharrean”.
RNE-ko Radio Clásica-k kontzertua zuzenean eskainiko du eta EITB irratiak aurrez grabaturik.
