Datorren astelehenean, otsailak 3, Orfeoiak nazioarteko bira hasiko du Toulouseko Kapitolioaren Orkestra NazionalarekinToulouseko Kapitolioaren Orkestra Nazionalarekin (ONCT, frantseseko sigletan) eta haren zuzendari titular den Tugan Sokhiev maisuarekin. Mussorgsky konpositorearen Boris Godounov opera interpretatuko dute, kontzerturako bertsioan. Toulouseko Halle aux Grains aretoan emango diote hasiera birari, otsailaren 3an. Hurrengo emanaldia hilaren 5ean izango da, Parisko Pleyel Aretoan, eta, ondoren, 8an Iruñeko Baluarte Entzunaretoan egongo dira. Azkenengo kontzertua Oviedoko Principe Felipe Entzunaretoan izango da, hilaren 10ean. Bakarlari gisa izango dira Ferruccio Furlanetto baxua, Anastasasia Kalagina sopranoa, Garry Magee baritonoa eta Ain Anger baxua.
Opera Alexander Pushkin-ek idatzitako drama izenkidean oinarritzen da, eta Boris Godounov tsarraren bizitza eta errusiar eta poloniar herrien arteko borroka kontatzen ditu. Orfeoiak behin baino ez du interpretatu obra hori. 1996ko Musika Hamabostaldian izan zen, Euskadiko Orkestra Sinfonikoarekin batera eta Hans Graf zuzendariaren aginduetara.
Orfeoiak harreman bikaina dauka ONCT orkestrarekin zein errusiar maisuarekin, Bolshoi antzokiaren zuzendari musikal izendatu berri dutena, eta, hain zuzen ere, erlazio on horri esker hirutan bisitatuko du frantses hiria. Hala, ekainean Orfeoiaren ahots zuriak Toulousera itzuliko dira, eta Mahlerren Hirugarren Sinfonia interpretatuko dute ekainaren 28an eta uztailaren 1ean, Halle aux grains aretoan, bertako orkestrarekin batera. Uztailaren 3an, berriz interpretatuko dute obra bera Colmarreko Jaialdian (Alsazia).
Azaroan, beste bi kontzertu programatuta daude Tolouseko Kapitolioaren Orkestra Nazionalaren egoitzan, baina egitarauak zehazteko daude oraindik. Horrez gain, abesbatzak Sokhiev maisuarekin eta ONCT orkestrarekin bat egingo du berriz abuztuaren 1ean, Donostiako Musika Hamabostaldian Berlioz-en Faustoren Kondenazioa eskaintzeko.
