Orfeoi Txikiak eta Les choristes filmeko soinu bandan ahotsa ipini zuten Les Petits Chanteurs de Saint Marc haur abesbatzak kontzertua emango dute hilaren 17an Donostiako Kursaaleko auditoriumean 20:00etan. Kontzertu honetako irabazia Fundación Educación Activa elkarterako izango da. Elkarte honen helburua ikasteko arazoak dituzten umeei arreta eta tratamendua ematea da. Hainbat arazo aztertzen dituzte; esaterako, hiperaktibitatea, dislexia, hizkuntzaren atzerapen ertainak eta arinak, haur depresioa, eta abar.
Kontzertuaren inguruan hainbesterainoko ikusmin handia sortu denez, sarrerak salgai jarri eta hamar egunera guztiak agortu ziren. 2004ko Christopher Barratier zuzendariaren filmaren arrakasta du abesbatza honek aurrekari moduan. Film horren ostean, Frantziako abesbatza eskoletan gero eta jende gehiago hasi zen izena ematen. Beste herrialdeetan egindako nazioarteko birek partaideen hezkuntza erabat dohainik mantentzen lagundu dute. Espainian lehenengo aldiz 2005eko Gabonetan izan ziren Madrilen eta 8.000 entzule izan zituzten. Era berean, Granadan, Bartzelonan, Kanarietan eta Balearretan ere izan dira. Donostiako kontzertu honetan, Orfeoi Txikiarekin batera kantatuko dute, eta txikiek proiektua gogo biziz hartu zuten.
Lehenengo zatian Lyongo abesbatzako 26 kidek abestuko dute, Nicolas Porte zuzendariarekin eta Dominic Faricier piano-jotzailearekin. Ondoko autoreen 25 kantu izango dira: Fauré, Rossini, Berlioz, Rutter, Barratier, Coulais eta Frantziako beste hainbat musikagile. Atsedenaldiaren ostean, bi abesbatzek batera kantatuko dituzte Coulais eta Barratierren bost abesti; Christophe Barratierren filmeko soinu bandako zati diren abestiak, hain justu. Horretaz gain, Eskuderoren Izar Ederra kantua ere gehitu dute, eta bi abesbatzek a capella abestuko dute; era berean, Ugalderen Iratxoa eta Sarasolaren Pater Noster izango dira Amaia Zipitria piano jolearen laguntzaz.
